பாராட்டும் பலவிதம்.

பாராட்டுக்கள் பலவிதங்கள்!

பாராட்டுக்கள் எல்லாமே

பாராட்டும் அல்லவே.

சீராட்டுக்கள் எல்லாமே--மெய்

சீராட்டும் அல்லவே.

பாராட்டுப் போதையில்தான்

பலரின்று ஆடுகிறார்.

சீராட்டில் மயங்கிச் சிலர்--பாவம்

சீரழிந்தும் வாடுகிறார்.

பாராட்டுப் பெறுவதற்கே

பலரின்று சேவைசெய்வார்.

சீராட்டுந் தலைவர்களிடம்--ஐயோ

சிக்கிப்பின் சீரழிவார்.

பாராட்டுத் தேடியே

பலரின்று மயங்குகிறார்.

சீராட்டும் வேசிகளாய்--பொய்யில்

சிலரதினில் வாழுகிறார்.

நல்லதைச் சொல்பவனை

நையாண்டி செய்கிறார்.

நயவஞ்சகப் பாராட்டையே--மயங்கி

நயமென்று நம்புகிறார்..

பாராட்டுக்குப் பாராட்டாய்

பழைய மொய் செய்யுவார்

பார்த்திட்டோ மென்பதற்காக--வேண்டாப்

பாராட்டியுஞ் செல்லுவார்..

ஏதோவொன் றெதிர்பார்த்து

இனிப்பாகப் பாராட்டுவார்.

இவனுக்கெல்லாம் பாராட்டா--மறுத்து

என்றே பின்னே பேசுவார்.

ஓட்டுக்கேட்போர் உளறலும்

ஒருவிதப் பாராட்டே.

பாட்டுப்பாடும் கவிஞனிடம்--தலை

ஆட்டுவதும் பாராட்டே..

பரவாயில்லை யருமையென

பழகாமலே பாராட்டுவார்.

அதுவென்னக் கேட்பதற்குள்--மறைத்து

அவர்  விலகியோடுவார்.

ஆறுதலுக்குச் சொல்லுகின்ற

அலங்கார வார்த்தைகளை

காதலென்றுங் கொள்ளாதீர்--அன்பில்

பாராட்டென்றென்றுந் துள்ளாதீர்..

ஆகா ஓகோ என்பதெல்லாம்

ஆசைகாட்டும் வார்த்தைகள்..

பாராட்டென நம்பித்ததான்--ஏமாந்து

பல்லாயிரம் கவிழ்ந்தனர்..

உண்மையான பாராட்டினை

கண்டறியப் பழகனும்.

நன்மைதரும்  பாராட்டினை--ஆய்ந்து

நயம் பிரித்துப் பயனுறனும்.

உள்ளதை உள்ளெடுத்து

நல்லதைப் பகுத்தெடுத்து

சொல்லியே திருத்திடும்---மனத்தின்

சுத்தமான பாராட்டு.

உள்ளந்தொடும் பாராட்டு

உள்ளிருந்து வெளிப்படும்.

கள்ளமில்லாச் சீராட்டு---பயனாக

கைமாறு  தேடாது.

நொய்யில்லாப் பாராட்டு

பொய்யொழுகிப் புகழாது

மெய்விளங்கச் சீராட்டி--மேலும்

உய்ய வழி காட்டிடும்.

வருத்தம் செய்யாப் பாராட்டு

திருத்தம் செய்து சீராட்டும்.

ஒளிபெருகத்  தூண்டிடும்--உயிர்க்கும்

உரிமையான  பாராட்டு.

தட்டித்தந்து வளரத்திடும்.

தடவிமுத்தம் செய்திடும்.

கட்டித் தங்கமாக்கிடும்--- நல்ல

பாராட்டுஞ் சீராட்டும்..

கொ.பெ.பி.அய்யா..