பழக பழக

படிக்கப் படிக்க.....

படிக்க படிக்க படிப்பு அறிவில்
புரிந்து துலங்குது-பாடம்
பழக பழக பதிந்து மனம்
தெளிந்து விரியுது.

விரிய விரிய வாதம் வழக்கில்          

திறந்து புரியுது--தேடல்
விளக்க விளக்க வெளிரும் உண்மை
விளங்கித் துலங்குது.

தேடத் தேட தெய்வ மூலம்
தூரம் தொலையுது-நம்பி
நெருங்க நெருங்க நெரிந்த ஞானம்
விரிந்து மலருது.

துருவத் துருவ தொலைந்த மெய்
தெரிய ஒளிருது-மாயை
அருகி அருகி அழிந்து பேதம்
அறிவும் தெளியுது,

அறிய அறிய அலையும் நெஞ்சம்
அமைந்து அடங்குது--அறிந்து
அணுக அணுக அமிழ்ந்த முகம்
அடையாளம் அடையுது.

மணக்க மணக்க மணக்கும் நிசம்

கணக்குமது தீருது-உறவும்

கனக்க கனக்க கடமை சுகம்

நினைக்க இனிக்குது.

கொ.பெ.பி.அய்யா.