இதுவா அரசியல்.

இதுதான் அரசியலா?

மக்களுக்கே உழைத்திட்ட

மாமனிதர் போற்றிட்ட

மறுவில்லா அரசியல்--இன்று

மறைந்த ஓர் விரசியல்.

காந்தியர் காமராசர்

ஏந்திய தேசியம்.

குடும்பவியம் ஆனதோ-இன்று

தடமாறிப் போனதோ!

விடுதலை விளைத்திட

விதையான உயிர்களே

விளைந்துதான் எழுவீரோ-இன்று

விடியலாய் விளைவீரோ!

ஏமாறுந் தமிழனோ

இழக்கின்றான் சுதந்திரம்..

சோமாறுந் தலைவனோ--இன்று

கொழுக்கின்றான் தினந்தினம்.

தண்ணீரும் தரமறுக்கும்

தரங்கெட்ட அரசியலாம்.

அந்நியரும் செய்யாரே--இந்திய

ஒருமையென பொய்யாதே!

ஒன்றுபட்ட சமுதாயம்

உருவாக்கும் உழைப்பெல்லாம்

விழலுக்கு நீராச்சோ---அந்தோ

வீணாத்தான் ஆயாச்சோ!

அப்பாவித் தொண்டனாக்கி

அடியாளாய் உருமாற்றி

மப்பிலே கொண்டாற்றி--வாழ்வர்

மடமையை அரங்கேற்றி.

இரவிலே விடுதலையோ!

இன்னமும் விடியலையோ!

உறவிலே இந்தியரோ---ஏனோ

உணர்விலே அந்நியரோ!

வாரிசு ஆட்சி முறை

வழக்கிலே ஒழிந்த கறை.

மாறாகிக் கட்சித் தலை--சூதனப்

புறவாசல் புகுந்த பிழை..

எட்டும் வரை நாட்டையே

கட்டுமறைக் கொள்ளையே.

வெட்ட வெளி ஆக்கவோ--பின்

பட்டம் சூடபிள்ளையோ!.

வெக்கங்கெட்ட அரசியல்

நக்கி வாழும் விரசியல்

மக்கள் அப்பாவிகள் ---பாவம்

சொக்கினர் தப்பியல்.

மேடை மொழிப் பேச்செலாம்

காடைப் பிடிக் கூச்சலாம்.

ஆடைதானே  வெள்ளையாம்--அவர்

வாடையே கொள்ளையாம்.

அவனை விட்டால் இவனுக்கா ?

இவனை விட்டால் அவனுக்கா?

எவனுக்கென்ன சேவகரோ--தமிழ்

கவனம் வைத்துத்த்துத் தேர்வீரே!!

கொ.பெ.பி.அய்யா..