தமிழாட்சி

தமிழாட்சி!

கும்மிப்பாட்டு.

கும்மியடி பெண்ணே கும்மியடி -கூடிக்

குனிந்து நிமிர்ந்து கும்மியடி.

அம்மா சக்தி பேரைச் சொல்லி-கைகள்

அடிச்சிப்ப் பாடிக் கும்மியடி

அடைந்து கிடந்த பெண்ணல்ல--அந்த

அடிமைப் பட்ட மண்ணல்ல.

பாரதிப் புலவன் புதுமைதான்-புரட்சி

பழகி வந்தோம் கும்மியடி.

அம்மி அரைத்த பழமையோ--சிறை

பம்மிக் கிடந்த பதுமையோ!

பாவலராம் பாரதிதாசன் --எழுச்சி

பயின்று வந்தோம் கும்மியடி.

ஊழை எண்ணிய கோழையா-அடுப்பு

வேலை பண்ணிய பேதையா?

பெரியார் மீட்ட விடுதலை--பெண்

உரிமை பெற்றோம் கும்மியடி.

ஆகாயத்தில் பறக்கிறோம்-கடல்

அடிக்குச் சென்றும் ஆய்கிறோம்

ஆணுக்கு நிகர் சிறக்கிறோம்--சமம்

அடைந்தோம் என்றும் கும்மியடி.

மடமையந்த பாவையன்று--வன்

கொடுமைப் பட்ட பூவையன்று.

வாளெடுத்தும் சுழற்றுவோம்--தீமை

வேறறுப்போம் கும்மியடி.

ஈழம் சென்றும் வென்றெடுப்போம்--தமிழ்

வாழும் என்றும் ஒன்றிருப்போம்.

ஆளும் தமிழ் ஆட்சி என்போம்--அந்த 

நாளும் இன்றே கும்மியடி.

கொ.பெ.பி.அய்யா.