ஊருக்கு ஓரு மடம்!

ஊருக்கு ஒரு மடம் 

ஊருக்கொரு மடமிருக்கும்

யாருக்கும் திறந்திருக்கும்.

வழிப் போக்கர் களைப்பாற-அன்புடன்

வரவேற்று உபசரிக்கும்.

இல்லை என்ற ஏழையர்கள்

பிள்ளை பெற்ற அனாதைகள்

மடம் ஒன்று இல்லாவிட்டால்-வேறு 

இடம் எங்கோ விரட்டிவிட்டால்

வீடுவாசல் இல்லா மக்கள்

வேர்வை சிந்தும் பாட்டாளிகள்

காடு வயல் விவசாயிகள்-தங்கி

கஞ்சித் தண்ணீர் குடிக்குமிடம்.

சின்னஞ் சிறு கூடுகளாம்.

அன்னங் காய்ச்சும் வீடுகளாம்.

விருந்தாளியாய் வந்தவர்க்கும்-படுக்கத்

திறந்திருக்கும் சொந்த மடம்.

வீதி ஒன்றாய் விரிந்த மடம்

சாதிக் கொன்றாய் சிறுத்த இடம் 

வேலையற்று அரசியல்-பேசும்

வீண் வாதக் கூடாரம்.

அன்ன தான சத்திரங்கள் 

சாலையோரம் ஆயிரங்கள்

வரலாற்றுச் சின்னங்கள்-இன்று

திருட்டுத் தொழில் கூடாரங்கள்.

வள்ளல்கள் கட்டி வைத்த

பள்ளி கொள்ளும் தர்மமத்த

இல்லாத ஏழையர்க்கு-உதவும்

இலவச சேவை மடம்.

கொ. பெ. பிச்சையா.